احتياجات المجندين في مركز التدريب و كل شئ عن الحياه بمركز التدريب - التجنيد والكليات العسكرية والشرطية

مركز التدريب, مستلزمات التجنيد, الحياة بمركز التدريب, احتياجات مركز التدريب, يوم الترحيل, كل شئ عن التجنيد

إضافة رد
  #1  
قديم 10-22-2013, 07:19 AM
الصورة الرمزية مول نت
مول نت مول نت غير متواجد حالياً
مؤسس المنتدي
 
برنامج الربح من المنتدي
مشترك (1 فبراير 2015)
تاريخ التسجيل: Apr 2011
المشاركات: 5,136
بمعدل: 2.12 يوميا
العمر: 28
الإقامة: مول نت
التقييم: 10
مول نت is on a distinguished road
افتراضي احتياجات المجندين في مركز التدريب و كل شئ عن الحياه بمركز التدريب

احتياجات المجندين في مركز التدريب و كل شئ عن الحياه بمركز التدريب

تجهيزات شاب التجنيد والاستعداد للترحيل لمعسكر التدريب
كل شئ عن احتياجات المجندين في مركز التدريب والحياة بمركز التدريب

حياتك في مركز التدريب من الالف للياء ، مكونات المخله ، الواسطه واوقاتها ، مدة التدريب ، مشاكل قد تواجهم في مركز التدريب كل هذا سيجيبك عليه موضوعنا باذن الله

مقدمه
الموضوع يخص من تعدي مرحلة الارجاء وتم ادراج مواليده ضمن المجندين في القوات المسلحه المصرية
ابدا معكم بقول الله غز وجل: "قل لن يصيبنا إلا ما كتب الله لنا"
وقوله تعالي: "عسي ان تكرهوا شيئأ وهو خير لكم"
برده مينفعش ننكر ان فيه ناس بتدخل الجيش فرحانه بانضمامها للقوات المسلحه
واخري لم يصبها الدور تحزن اشد الحزن علي استبعادها من الخدمه اه والله بتحصل

عامتا اقنع نفسك انك في الجيش بتخدم وطنك وبلدك ودينك وان في الاخر طبعا هتستفاد كتير جدا في حياتك بعد كده
لان تجربة الجيش بتعلمك في سنه اللي متعلموش غيرك في 20 سنه


احتياجات المجندين في مركز التدريب و كل شئ عن الحياه بمركز التدريب


أهم نقاط الحديث

هنركز الكلام عن 4 حاجات وهم
- مدة مركز التدريب
- المتطلبات ومستلزمات شاب التجنيد في مركز التدريب
- طبيعه الحياه في مركز التدريب واهم عيوبها والتصرف فيها
- واخيرا عن الواسطه

اولاً: مدة التدريب في مراكز التدريب
مركز التدريب مدته المنصوص عليها هي 45 يوم تدريب بالمعسكر ثم التوزيع والترحيل لوحدتك الاساسية اللي هتخدم فيها وده كان السائد حتي ثورة يناير من وقتها تم تقليص المده ووصلت في سنه 2011 لبعض الاسلحه الي 10 او 11 يوم وفي بعض المراكز وصلت لـ 7 ايام فقط لظروف خاصه بها ثم في 2012 ارتفعت قليلا ووصلت لـ 15 يوم لبعض الاسلحه .. عامتا ال عاوز اوصله ان المده المنصوص عليها 45 يوم فعلا لكن حاليا مدة التدريب لا تصل لـ 45 يوم من بعد 25 يناير وحتي الان وطبعا بتختلف المده حاليا من سلاح لأخر .. كان الاول مفيش فرق لان كله 45 يوم لكن دلوقتي بقي كل سلاح غير التاني والسائد حاليا ان الاسلحه "المميزه" كالجويه والبحريه ودفاع جوي وهكذا بيوصل المده ليهم من 15 : 20 يوم لكن الاسلحه "الاقل" كالمشاه والمدفعيه والمدرعات وهكذا بتكون تقريبا 25 يوم وبالنسبه للمؤهلات المتوسطه بتبقي ازيد شويه من الارقام دي

ثانياً: احتياجات المجند في مركز التدريب
في البدايه احب اقولك انك لازم تمشي من بيتك كل احتياجاتك معاك ومتعتمدش ان هناك فيه كانتين هلاقي في كذا وكذا او هما هيسلمونا كذا !! لا تاخد كل حاجاتك معاك ولازم تظبط نفسك ف كل حاجه عشان تخفف عن نفسك خنقة الحياه بمركز التدريب

طبعا مع اختلاف مدد التدريب هقول اعداد المستلزمات علي افتراض ان مدتك 20 يوم وباستهلاك طبيعي
اولا اللبس: وانت رايح عشان تترحل لمركز التدريب حاول تكون لابس "اعفن" حاجه عندك يعني حاجه متكنش باكي عليها لان اللبس ده هيتبهدل بهدلة السنين

ثانيا الشنطه: هتحتاج شنطه متوسطه الحجم تحط فيها احتياجاتك
ممكن شنطه مدرسيه او شنطة سفر محندقه ومتخدش شنطه كبيره لانها لو كبيره هتحتاس بيها وانت ماشي بالمخله ( الله يخفف عليكوا حملها ) ويفضل متكنش شنط بعجل لان الشنط دي بتبقي رزيه وهتطلع عينك وانت ماشي بالمخله والارض هناك كلها رمل وكمان عشان متاخدش مكان في الكلاستر بتاعك وتعرف تحط المخله بتاعتك

بالنسبه بقي للي جوا الشنطه
هقول نقطه نقطه ولو في نقطه محتاجه تعليق هعلق عليها


- 5 اطقم داخلي ابيض
في ناس بتقول ينفع الوان اه ممكن بوكسرات الوان او اشراط مفيش مشكله لانها مش هتبان لكن الفانلات يفضل انها تبقي ابيض لان لو رتبه هناك او حتي صف ظابط شاف لون الفانله من لياقة الافرول هيغلس عليك ( افرول يعني البدله العسكرية )

- مكن حلاقه
مكن حلاقه بلاستيك كاجيليت او لورد الافضل لك
وطبعا العدد يتحدد حسب طبيعة دقنك!
في ناس مش طالعلها دقن ودي بتبقي حظها حلو ف الجيش وناس دقنها كثيفه ودي بتعاني في الجيش فتقدر تحسب استهلاكك ع حسب طبيعة دقنك
لكن عامتا اقولك ان دقنك هتتحلق ع الاكثر يوم ويوم ولو بتطول بسرعه كبيره يبقي هتضطر تحلق كل يوم وربنا يعينك

- سائل الحلاقة
يفضل ان يكون جل او فوم ( رغوه ) لسهولتها ولا يفضل استخدام معجون وفرشه حلاقه لان المايه بتقطع كتير وقد تضطر للحلاقه في اي مره بدون استخدام المياه!!

- عدد 3 صابون

- صبانه صغيره
وهي علبة بلاستيك لحفظ الصابون عشان الصابونه متبهدلش الدنيا عندك ف الشنطه لما تتبل او حتي عشان متبوظش من الكيس وكده

- عدد 6 اكياس مسحوق ( اريال او برسيل او غيره ) صغيره الحجم
اكياس من الصغيره ال بتكون اصغر مقاس لان ممكن تروح بالكيس الحمام يخلص منك ع طول كل واحد يقولك ممكن شويه صغيرين والاشتغالات دي وممكن تنساه او يقع منك ف الحمام وغيره فالافضل تاخد اكياس صغيرة

- فوطه
في ناس ممكن متاخدهاش وبيبقي الهدف توفير لمساحه الشنطه لان هناك هتستلم فوطتين في المخله وبيكونوا جداد ونضاف

- ليفه استحمام
محدش ياخد الليفه الكبيره بتاعت السوق دي احنا مش رايحين نصيف الليفة تكون الطبيه الصغيره دي ال بتتباع في محلات ادوات التجميل

ودي صوره ليها
احتياجات المجندين في مركز التدريب و كل شئ عن الحياه بمركز التدريب

- شامبو اكياس صغيره
يفضل ان الشامبوا يكون اكياس وميكنش العبوات الكبيره
اولا عشان نفس سبب "مسحوق الغسيل" هتروح بيه الحمام هيخلص منك هناك وممكن لاقدر الله تنساه او يتسرق منك او كده فيفضل اكياس صغيره
ولها فايده تانيه برده ان ممكن يفضل كيس في جيبك طول ما انت في الطوابير والتدريب عشان لو هتغسل ايدك بيه قبل وجبه الغدا او لاي سبب كان فبيكون طريقة فعاله وسهله جدا باعتباره صابونه متنقله

- فرشة ومعجون اسنان صغير
يفضل تكون احجامهم صغيره يعني تاخد معجون من المقاس الصغير كتوفير ثقل ومساحه ف الشنطه

- مزيل عرق
بالنسبة للمزيل المسموح به البليه الدوارة وليس سبراي لانها قد تستخدم في غرض اخر للاشتعال فعشان كده مبيدخلوش الاسبراي الا ان عرفت تخفيها وانت داخل ومن افضل انواع البليه من وجهة نظري هو ريكسونا

- فرشة شعر بلاستيك صغيره
وبالنسبه للي حلق ع الزيروا يبقي مش هيحتاجها

- شبشب
تاخد شبشب معاك وده هتقضي بيه نص يومك لان طول ما انت ف المبيت مش هتلبس البياده طبعا هتبقي حر بشبب طالما في حدود المبيت ولم تخرج عنها وطبعا هتدخل بيه الحمام وهكذا

- مرايه صغيره جدا
دي انت خدها معاك بس اعمل حسابك ان احتمال 90% هتتاخد منك وتتكسر وهما بيفتشوك ولو عديت بيها يبقي خير وبركه

- خرطوم حمام
خرطوم حمام حوالي متر .. طبعا الحمامات هناك بلدي يعني حنفيه وخرطوم المشكله ان اوقات مبيبقاش فيه خرطوم وبيبقي منك للحنفيه ع طول واللي مبياخدش معاه خرطوم غصب عنه بيلجأ للمناديل وكده

- قصافة اظافر

- باكته مناديل ( 12 منديل ) جيب صغيره
ودي ممكن متاخدهاش وتبقي تشتري من الكانتين لانها باذن الله موجوده بكل المعسكرات او تاخد عدد قليل معاك وتبقي تزود هناك من الكانتين حسب احتياجك

- قطن اذن
زي ال في الصوره دي .. هتنعنشك اكيد بعد الدش
احتياجات المجندين في مركز التدريب و كل شئ عن الحياه بمركز التدريب

- ديتول

وتستخدم للتعقيم زي السفنجه ال هتنام عليها هتعقمها اول ما توصل وتعرف سريرك وتعقم الكلاستر بتاعك ( دولابك ) وهكذا بس تكون علبه صغيره جدا لان استخدامها محدود

- ملاية سرير
ممكن تاخد ملايه خفيفه تفرش بيها سريرك وممكن جدا متاخدهاش وتكتفي بالملايه وكيس المخده ال هتستلمهم في المخله وبرده بيكونوا جداد ونضاف

- ملعقة

- مقص صغير
يكون الصغير اللي بيتطبق زي ال في الصوره ده عشان تعرف تدخل بيه وميتاخدش منك

احتياجات المجندين في مركز التدريب و كل شئ عن الحياه بمركز التدريب

- 4 اربطه بياده
بيكون رباط طويل جدا ومخصص للبياده ودي حاجه مهمه لان الاربطه ال بتستلمها مع البياده بتكون قصيره وهطلع عينك وانت بتلبس وبتقلع البياده فبتاخد معاك الاربطه الطويله عشان تسهل عليك كتير جدا وقت ومجهود في لبس البياده

- ملمع احذية
تاخد ملمع احذيه سريع .. فيه نوع اسمه سلفر silver وده كويس جدا ودي صورته

احتياجات المجندين في مركز التدريب و كل شئ عن الحياه بمركز التدريب

- بودرة قدم
وده بيكون لمنع اي رائحه للقدم لان طبعا انت لابس البياده طول النهار وحركه وعرق فبيبقي الوضع في غايه السوء ان لم تستخدم معقم للقدم وده انت بتدعك بين صوابع رجليك قبل ما تلبس الشراب وممكن تحط برده رشه خفيفه داخل البياده

- استيك ملابس
وده فايدته ف كذا حاجه
ممكن تستخدمه في تضييق اي بنطول او شورت رياضة هتستلمه لان طبعا المقاسات مش هتبقي مظبوطه عليك
وممكن تستخدمه كمنشر غسيل يعني تربط الخيط ده بين سريرين او حتي علي سريرك وتقوم ناشر عليه لبسك ال هتغسله
وممكن تستخدمه في الربط وحاجات تانيه هتظهر قدامك هناك

- خيط وابره
وده مهم جدا عشان هتظبط هدومك اللي هتستلمها علي ايدك

- قلم جاف وقلم سبوره
القلم الجاف معروف للكتابه العاديه
القلم السبوره بقي عشان هتكتب اسمك علي مخلتك وقت الترحيل عشان كل واحد يميز مخلته عن التاني

- محفظه
لحفظ كارنيه الجيش وبطاقتك وفلوسك

- ساعه
ساعه تلبسها في ايدك واكيد هتفيدك

- مصحف صغير

- علاج
تاخد مضاد حيوي وعلاج برد واسهال وامساك وصداع
ولو نص شريط من كل حاجه ووانت داخل المركز بيبقي فيه دكتور بيبص علي الادويه اللي معاكوا عشان يتاكد انها مش مخدرات اما بقي لو رخموا علي الاخر هيمنعوا يدخلوكوا بادويه وده مبيحصلش كتير

- خط موبايل
اولا بالنسبة للموبايل طبعا ممنوع ومشدد عليه خاصه في مركز التدريب واللي بيتمسك بيه لو رتبه رخمه ممكن يحبسك دون رحمه فعشان كده متحاولش حتي تخبيه لان طول ماهو معاك اكنك معاك مخدرات بالظبط
فانت هتاخد خط موبايل مشحون ( برصيد ) وفي بعض مراكز التدريب بيبقي فيه موبايل مع عسكري امن بيسلمه للمجندين في المبيت وبيكلموا اهلهم وبعدين يرجع ياخده تاني ومراكز اخري مبيعملوش كده فانت بتتكلم من موبايل اي عسكري امن او اي صف ظابط هناك بخط موبايلك
وفي بعض المراكز بيبقي فيها ميناتل وان كنت من ضمن المراكز دي متقلقش هتلاقي كروت الميناتل بتتباع في الكانتين بتاعكوا

فايدة خط الموبايل غير انك تطمن اهلك عليك وتطمن عليهم انك هتستخدمه في التواصل مع الواسطه في اهم مرحله انت محتاجه فيها وانت في مركز التدريب وهتكلم عنها بالتفصيل وانا بتكلم عن الوسايط في اخر الموضوع

- عدد 3 اقفال
قفل كبير للكلاستر ( دولابك )
قفل كبير للمخله بتاعتك اللي هتستلمها
قفل صغير للشنطه بتاعك اللي هتروح بيها

- مادليه مفاتيح
تكون فيها كل مفاتيحك وتبقي سهله تعلقها في بنطلونك او في السلسلة

- الفلوس
نقطه الفلوس دي تخصك انت يعني هتعتمد علي اكل الكانتين بس ولا معندكش مشكله في اكل الميس وبرده استهلاكك للاكل لكن عامتا نقدر نقول هتحتاج حوالي 400 جنيه ان كنت من هواه الكانتين وفي حالة ان كنت غير مدخن

- اخيرا حاجه كنصيحه فقط
في مركز التدريب هتستلم كاب مموه وفي الغالب مقاسات مش بتبقي مظبوطه وراسك مبتدخلش فيها وهتخنقك خاصه انها كمان مبتحميش من الشمس لو كانت صغيره فان اردت ممكن تشتري كاب مموه من اي مكان وليكن من بائعي رمسيس مثلا وتحطه ف الشنطه وتروح بيه وتبقي مش شايل هم ان الكاب يطلع صغير ولا بايظ ولا ولا

مستلزمات لبعض المراحل التجنيديه
- لمجندين مرحلة يناير
يفضل انك تاخد معاك طقم تدفئه ( كلثون ) للحمايه من بروده الجو خاصة في الليل لان مراكز التدريب كلها مناطق مكشوفه وفي الصحرا فالجو بيبقي صعب جدا او لو مش عاوز يبقي تعوض بجاكيت الافرول ال هتستلمه او بفانلة اللياقة تلبسها تحت

- لمجندين مرحلة يوليو
يفضل انك تاخد كريم شمس صغير ومتكسفش وتقول الناس هتعيب عليا والكلام ده مرحلة يوليو جحيم هتروح بشرتك بيضه هترجع سوداني ومدي علي صومالي فهتحط الكريم بعد ما تتشطف الصبح وقبل ما تنزل الطابور عشان يخفف من اثار الشمس لانك في بعض الايام ممكن تفضل في محاضره او تدريب في الشمس من 8 او 9 صباحا وحتي غروب الشمس والله المستعان

مستلزمات لن تحتاجها
- البطانيه
مش هتحتاجها معاك لانك هتستلم 3 بطاطين هناك وطبعا ان مش ناقص حمل زياده اونطه

- الملايه وكيس المخده
برده ممكن متخدهمش لانك هتستلمهم هناك وبتكون حالتهم جيده جدا

- الاكل
متخدش اكل معاك بغرض تخزينه هناك لان الاكل بيتاخد منك وانت داخل المركز عشان تنفع الكانتين فيقتصر الاكل ال معاك علي سفر اليوم فقط


ثالثا: طبيعه الحياه في مركز التدريب واهم عيوبها والتصرف فيها
- طبعا انت داخل مكان مجهول بالنسبالك فالحرص في كل شئ واجب عليك

- وطبعا انت هناك مأمور بتنفذ كل الاوامر الموجه لك الا 3 اوامر فقط متنفذهمش في حالة حد امرك بيهم وهم شرفك مهماتك فلوسك
-- شرفك معروفه ومش محتاجه توضيح
-- مهماتك يعني محدش ياخد منك اي حاجه انت استلمتها لان كل حاجه استلمتها عهده عليك وهترجع تسلمها تاني وانت بتسلم جيش باذن الله
-- فلوسك معروفه ان محدش ياخد منك اي فلوس تحت اي مسمي وانت في الجيش كله مجاني عدا الكانتين

بالنسبة لمكونات المخله
3 بطاطين - ملايه - كيس مخده - 2 افرول - 2 بدلة زيتي ( للاجازه والماوريات ) واحده صيفي واخري شتوي - فانله صوف ( بلوفر زيتي ) - زنط مموه - زنط زيتي - 3 شراب - بياده - جذمه - كاب مموه - كاب زيتي - 2 فانله لياقة - شورت لياقة - كوتش لياقة - شبشب - 2 فوطه - اطقم داخلي حمالات ونص - قايش ( حذام ) - بيجامه شتوي - بيجامه صيفي
- بعد كده بتستلم سلسله و 2 قرص معدني

نبذه عامه عن اول يوم جيش
اول يوم جيش ليك هيبقي من اصعب ايامك في الخدمه لانك هتبقي رايح بسفر الله اعلم بمداه وهتدخل المركز وتفطر ان كنت وصلت في معاد مبكر وبعدين تاخد الحقن وللاسف الحقن دي ممكن تعمل ورم بسيط ف الكتف وممكن توقف ايدك خالص ويصعب عليك الحركه بس ده بيبقي تاني يوم ( لما بتنام وتصحي ) وممكن مع بعض الناس تعمل صداع وترجيع وسخنيه .. بس مع اغلب الناس بيقتصر علي وجع في الكتف وبتكون كل الاعراض دي اما نفس اليوم مساءا او تاني يوم لما بتصحي

بعد كده هتستلم المخله وهتمموا عليها كامله كلكوا وانت فارش ع الرمله وقاعد اكنك في سوق الجمعه وبعد كده هتطلع علي المبيت هتفضل مستني لحد ما يسكنوا واحد واحد فيكوا وبعد كده هتلبسوا الافرول وبعدين تجمعوا تاني ويتمم عليكوا
طبعا كل ال بقوله في لحظات ده هيتم في ساعات وربنا يكون في عونكم وده في الغالب ال هيحصل معاكوا لو وصلتوا مركز التدريب صباحا

نبذه عن الحياه العسكرية في مركز التدريب
اولا انت هناك بتبقي اصغر حاجه في الجيش يعني كله بيحط عليك حتي العسكري اللي زيك بس اقدم منك هيعاملك معامله مش كويسه الا من رحم ربي

حدودك هناك انك تنفذ كل ال يتقالك تعامل الناس هناك باحترام لان حتي لو لقيت صف الظابط ال قدامك عمال يضحك ويهزر وقولت كلمه معجبتهوش هيقلب عليك في لحظه هناك محدش يعرف ابوه

اي حد بيتعاطي حشيش او ما شابه ينسي الكلام ده احسن لان ده قانونا سجن و10 الاف جنيه غرامه وفيه تحليل ممكن يتعملك في اي لحظه ان حد شك فيك

في مركز التدريب بيحصل اوقات تفتيش مفاجئ علي المبيت عشان لو اي حد مخبي حاجه يقفشوه زي مثلا مخدرات او موبايل او اي شئ ممنوع فاحذر وحط في بالك ان الجيش مليان عصافير يعني متديش الامان لاي حد

وانت هناك هتلاقي فيه عساكر امن للاسف بيتاعملوا مع المستجدين باعتبارهم خدامين هما بيبقوا عارفين انكوا مش فاهمين حاجه وخايفين من كل حاجه وعشان ناس منهم بيبقي عندهم نقص في حياته المدنيه فبيتنططوا عليكوا فانت متخفش من اي عسكري طالما انت مغلطش فيه او مبجحتش فيه يبقي مش هيقدر يعملك اي حاجه

كارنيه التجنيد اهم منك شخصيا اوعي يضيع منك لان ضياعه فيها محاكمه عسكريه وحبس

في ناس منكوا هيتخدوا عساكر كانتين وفيه عساكر ميس ( ميس اللي هو مكان اكلكوا ) انت لو عرفت تبقي من ضمن عساكر الكانتين يبقي زي الفل لانك هتترحم من الطوابير والعذاب ال بيشفوه في ارض الطابور تحت الشمس وبرده لو عسكري ميس بيبقي كويس بالنسبه لدفعة يوليو لانك بتترحم من الشمس ودي اهم حاجه بس بتتعب جوه المطبخ في تنضيف السرفيس والمكان بس برده ارحم من عذاب الطوابير والبهدله ال فيه
وفي بعض المراكز بيكون عسكري الكانتين او الميس بيتغير كل يوم وبيختاروا ناس جديده كل يوم وفيه صف ظباط في مراكز تانيه ممكن يختار عساكر ويخليهم معاه كل يوم عشان بتبقي اتعلمت طبيعة الشغل وميحتاجش كل يوم يعلم ناس جديده

السرقـــــــــــات
دي حاجه مهمه جدا ومتديش الامان خالص في اي موقف وتحت اي ظرف ابسط الاشياء ممكن تتسرق منك لو سيبت بس الصابونه علي الحوض ودخلت الحمام ممكن تطلع متلقيهاش فما بالك بفلوسك ولا هدومك وانت في الحمام ولا اي حاجه تسيبها علي سريرك وتخرج او تكون غاسل وناشر هدومك سايبها وتروح في اي مكان وهكذا

رابعاً: الواســــــطه
ان كنت من محبي الواسطه وعندك رتبه في الجيش او غيره متاحه فانت هتحتاجها 3 مرات بشكل اساسي
- الاولي: بعد سماع الارجاء بتصور الـ 110 جند وتدهاله عشان يدخلك سلاح كويس او سلاح يقدر يخدمك فيه
- التانيه: بتكون وانت في مركز التدريب وانت هناك هتعرف حاجه اسمها رقم السجل وكل واحد مجند له رقم سجل الرقم ده اول اما تعرفه هتقوم تتصل بالواسطه بتاعتك وتعرفه رقمك "ودي الفايده ال كنت بقول عليها للموبايل" وهو بالرقم ده هيوزعك في مكان كويس قريب من محل اقامتك او مكان اجازاته كويسه او زي ما انتوا متفقين
- التالته: بتكون وانت في وحدتك الاساسية وبتكون عشان تتحط في مكان كويس في وحدتك ويكون مهمتك او خدمتك في حاجه كويسه لان حتي جوا نفس الوحده بتختلف الادوار وتختلف حتي فترة الاجازات

في النهاية اتمني لكم التوفيق جميعا واتمني لكم السلام من كل شر وتوكلوا علي الله
ولاي استفسارات انا متابع معكم

من فضلك ان استفدت بالموضوع فلا تبخل علينا بنشره علي الفيس بوك او تويتر او اي موقع اجتماعي اخر ولكم جزيل الشكر

شارك اصدقائك الان .. رابط الموضوع للنسخ
http://www.moolnt.com/vb/showthread.php?s=c8bbabbbbe1a970c6b6c7f77d37cb20c&t=12034
رد مع اقتباس
قديم 10-22-2013, 10:36 AM   #2
غير مسجل
زائر مول نت
المشاركات: n/a
بمعدل: 0 يوميا
افتراضي

ممتاززززززززززززززززززززززز
  رد مع اقتباس
قديم 10-22-2013, 08:58 PM   #3
مول نت
مؤسس المنتدي
الصورة الرمزية مول نت
تاريخ التسجيل: Apr 2011
المشاركات: 5,136
بمعدل: 2.12 يوميا
العمر: 28
الإقامة: مول نت
معدل تقييم المستوى: 10
مول نت is on a distinguished road
برنامج الربح من المنتدي
مشترك (1 فبراير 2015)
افتراضي

اقتباس:
المشاركة الأصلية كتبت بواسطة غير مسجل مشاهدة المشاركة
ممتاززززززززززززززززززززززز


شكرا علي ردك وبالتوفيق ان شاء الله
نورتني


مول نت غير متواجد حالياً   رد مع اقتباس
قديم 10-23-2013, 12:57 AM   #4
غير مسجل
زائر مول نت
المشاركات: n/a
بمعدل: 0 يوميا
افتراضي

موضوع رائع والله ..

جزاك الله خيرا

ناخد سجادة صلاة معانا كمان ..
  رد مع اقتباس
قديم 10-24-2013, 02:50 AM   #5
مول نت
مؤسس المنتدي
الصورة الرمزية مول نت
تاريخ التسجيل: Apr 2011
المشاركات: 5,136
بمعدل: 2.12 يوميا
العمر: 28
الإقامة: مول نت
معدل تقييم المستوى: 10
مول نت is on a distinguished road
برنامج الربح من المنتدي
مشترك (1 فبراير 2015)
افتراضي

اقتباس:
المشاركة الأصلية كتبت بواسطة غير مسجل مشاهدة المشاركة
موضوع رائع والله ..

جزاك الله خيرا

ناخد سجادة صلاة معانا كمان ..

وجزاك كل خير
انت صح .. فيه سجاده صلاه اللي هيا بتطبق
وبتتحط ف شنطه صغيره عشان مبتاخدش مساحه ودي صورتها



المصليه الكبيره دي بتطبق وبتتحط في أي من الاكياس الصغيره ال في اخر الصوره دول وبتبقي حاجه بسيطه في شنطتك مقارنة بالمصلية العاديه
شكرا علي ردك واضافتك نورتنا

مول نت غير متواجد حالياً   رد مع اقتباس
قديم 12-18-2013, 10:39 AM   #6
ندى الورد
عضو مثالي
الصورة الرمزية ندى الورد
تاريخ التسجيل: Nov 2013
المشاركات: 5,314
بمعدل: 3.54 يوميا
معدل تقييم المستوى: 10
ندى الورد is on a distinguished road
افتراضي

بصراحه الله ينور عليك بيتهيالى ما نسيت شئ
حتى القلم مانسيته

بس لازم كراسة صغيره علشان تكتب فيها
ندى الورد غير متواجد حالياً   رد مع اقتباس
قديم 12-18-2013, 11:17 AM   #7
مول نت
مؤسس المنتدي
الصورة الرمزية مول نت
تاريخ التسجيل: Apr 2011
المشاركات: 5,136
بمعدل: 2.12 يوميا
العمر: 28
الإقامة: مول نت
معدل تقييم المستوى: 10
مول نت is on a distinguished road
برنامج الربح من المنتدي
مشترك (1 فبراير 2015)
افتراضي

اقتباس:
المشاركة الأصلية كتبت بواسطة ندى الورد مشاهدة المشاركة
بصراحه الله ينور عليك بيتهيالى ما نسيت شئ
حتى القلم مانسيته

بس لازم كراسة صغيره علشان تكتب فيها



شكرا علي الاضافة اخت ندي
فعلا ممكن يتاخد كراسه صغيره لكتابة اي شئ هناك
نورتي الموضوع بردك




مول نت غير متواجد حالياً   رد مع اقتباس
قديم 12-19-2013, 01:16 PM   #8
غير مسجل
زائر مول نت
المشاركات: n/a
بمعدل: 0 يوميا
افتراضي

تمام جدااااااااااااا
بس هو الاستك ده اللي هو الرفيع ولا العريض ﻷن في ناس بتؤل هنجتاج العريض عشان نربط البنطلون جوة البيادة !! ومعتقدش ان ده اللي انت تقصده صح ؟؟؟ كدا هحتاج النوعين ولا ايه ؟؟؟
والخرطوم ده مش ممكن نشتريه من مركز التدريب ولا مبيكونش موجود ؟؟؟
وبالنسبة للتفتيش هو بيكون ازاي يعني كله ادام بعضه ولا ايه ؟؟؟؟؟ انا بتكلم عشان لو معايا وسطة مثلا وممكن يدخلي حاجة هل ده هيبأى ادام حد ولا كل واحد بيتفتش لوحده من غير ما حد يشوفه ؟؟؟ وعشان برضوا التعليقات المستفذة للي بيفتشوا وكدة
اخر حاجة معلش هل الحاجت دي لكل مراكز التدريب ولا النضيفة بس زي جوية مثلا ؟؟؟؟
وشكرا مقدما واسف على الاطالة
  رد مع اقتباس
قديم 12-19-2013, 04:44 PM   #9
مول نت
مؤسس المنتدي
الصورة الرمزية مول نت
تاريخ التسجيل: Apr 2011
المشاركات: 5,136
بمعدل: 2.12 يوميا
العمر: 28
الإقامة: مول نت
معدل تقييم المستوى: 10
مول نت is on a distinguished road
برنامج الربح من المنتدي
مشترك (1 فبراير 2015)
افتراضي

اقتباس:
المشاركة الأصلية كتبت بواسطة غير مسجل مشاهدة المشاركة
تمام جدااااااااااااا
بس هو الاستك ده اللي هو الرفيع ولا العريض ﻷن في ناس بتؤل هنجتاج العريض عشان نربط البنطلون جوة البيادة !! ومعتقدش ان ده اللي انت تقصده صح ؟؟؟ كدا هحتاج النوعين ولا ايه ؟؟؟
والخرطوم ده مش ممكن نشتريه من مركز التدريب ولا مبيكونش موجود ؟؟؟
وبالنسبة للتفتيش هو بيكون ازاي يعني كله ادام بعضه ولا ايه ؟؟؟؟؟ انا بتكلم عشان لو معايا وسطة مثلا وممكن يدخلي حاجة هل ده هيبأى ادام حد ولا كل واحد بيتفتش لوحده من غير ما حد يشوفه ؟؟؟ وعشان برضوا التعليقات المستفذة للي بيفتشوا وكدة
اخر حاجة معلش هل الحاجت دي لكل مراكز التدريب ولا النضيفة بس زي جوية مثلا ؟؟؟؟
وشكرا مقدما واسف على الاطالة


بالنسبة للاستيك مفيش داعي تاخد نوعين لو انت هتاخد العريض يبقي تقضي بيه برده بقية احتياجاتك
وبالنسبة لحكاية البياده والبنطلون فيه تافيزة جاهزة مخصصه للجيش بتتباع في الاماكن اللي بتبيع ملابس الجيش زي مثلا محطة رمسيس واسمها تأفيذة بيادة وبتكون سوده وعريضه حوالي 7 سم
ودي انت بتلبسها فوق البنطلون عند فوة البيادة وبتخلي منظرك افضل بكتير وراحة من الاساتك والكلام ده .. ودي بتبقي ظاهره عادي لانها مسموح بيها تبع الزي العسكري

بالنسبة للخرطوم مبيتبعش هناك وبعدين انت يدوب هتجيب بتاع متر واحد وبيتلف حولين بعض يعني مش بياخد مكان

بالنسبة للتفتيش بتكونوا متجمعين وبتدخلوا خمسات مثلا علي الناس ال بتفتش بس كلكوا ف مكان واحد وشايفين بعض .. وبالنسبة للواسطة فلو معاك واسطه قويه بيتدخلك في كل كبيره وصغيره اوك هيعديك من غير ما تستني اصلا تدخل علي اللي بيفتش

وبما انك داخل جويه مش هتلاقي غلاسه جامده يعني مش محتاج واسطه انت مش هتهرب يعني حاجات مخالفة
مول نت غير متواجد حالياً   رد مع اقتباس
قديم 07-19-2014, 12:12 PM   #10
غير مسجل
زائر مول نت
المشاركات: n/a
بمعدل: 0 يوميا
افتراضي

والله ياباشا انت استاذ وفيدتنى جدا
انا رايح اسمع السلاح بكرة وهترحل بعده
بس ليا كام سوال ايه نظام الاستيك الملابس ده ؟؟ اللى هو الابيض ده ؟
وايه نظام الزيارات لما حد يجيلى فى الزيارة ويخش بموبايل بكاميرا عادى ولا ايه
  رد مع اقتباس
إضافة رد
الموضوع: احتياجات المجندين في مركز التدريب و كل شئ عن الحياه بمركز التدريب الرد على الموضوع
اسم العضو الخاص بك:
للعلم - لكونك زائر - بعد كتابة ردك والضغط علي زر "اعتمد المشاركة" بالأسفل
سيتم انتقالك لصفحه اخري للرد علي السؤال العشوائي
-:(اسعدنا ردك وتفاعلك):-

مواقع النشر

أضف تعليق لك من خلال الفيس بوك

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 06:44 AM.


Powered by vBulletin® Version 3.8.8
Copyright ©2000 - 2017, vBulletin Solutions, Inc.